Mgomo
uliotangazwa na Chama cha Walimu Tanzania (CWT) dhidi ya Serikali
unaokusudia kufanyika hivi karibuni umeingia katika sura mpya baada ya
walimu wa Manispaa ya Kigoma Ujiji kuupinga kuwa hauna maana wala tija
bali umetangazwa na viongozi wa chama hicho kutokana na maslahi yao
binafsi.
Katika taarifa yao waliyoisambaza kwa
vyombo vya habari na kusainiwa na Mwenyekiti wa walimu waliojitoa CWT,
Sabidi K. Sabidi, walisema mgogoro huo ni kati ya viongozi wa chama
hicho na serikali na siyo walimu kama inavyoelezwa.
Kabidi alisema viongozi wa CWT Taifa
lazima watambue kuwa mgomo siyo suluhisho la kumaliza tatizo bali
kinachotakiwa kufanyika ni mazungumzo na serikali kwani kumekuwa na
migogoro mingi kati ya chama hicho na serikali lakini haijaweza kuzaa
matunda.
Alisema walimu katika Manispaa ya Ujiji
hawaoni umuhimu wa kujiingiza katika mgogoro huo kwasababu bado serikali
inaendelea kuyatafutia ufumbuzi madai ya walimu kwa awamu hivyo kugoma
hakutasaidia badala yake kutakwamisha jitihada zinazofanywa na serikali.
Alisema viongozi wa CWT wamalize kwanza
kushughulikia matatizo yaliyopo ndani ya chama chake yanayolalamikiwa na
wanachama badala ya kukimbilia migomo kana kwamba wao ni wasafi ndani
ya chama.
Chama cha Walimu Tanzania kimetangaza
mgomo wa walimu nchi nzima utakaoanza Julai 7, mwaka huu ikiwa ni
shinikizo la madai ya nyongeza ya mishahara na posho za kujikimu na
kufanya kazi kwenye mazingira magumu.
Katika mkutano uliofanyika mjini Dodoma
hivi karibuni, baraza la CWT liliagiza kuwa Juni 5, mwaka huu viongozi
wa CWT, ngazi zote kutekeleza matakwa ya kutangazwa mgogoro kwa mujibu
wa sheria za Ajira na mahusiano kazini ya mwaka 2004.
Baraza hilo liliidhinisha kuwepo kwa mgomo
ikiwa serikali itashindwa kutekeleza matakwa ya walimu ya kutaka
kuongezewa mshahara kwa asilimia 100. katika mgomo huo.
