Mazoezi Simba yanoga
MAANDALIZI ya Simba kwenye michuano ya Kombe la Kagame yameongezewa nguvu baada ya kuwasili kwa kocha wake mkuu Milovan Cirkovick.
Akizungumza jijini jana, Ofisa Habari wa Simba Ezekiel Kamwaga alisema, Milovan aliwasili jana Alfajiri akitokea Serbia alipokwenda kwa ajili ya mapumziko. Michuano ya Kombe la Kagame inatarajiwa kuanza Julai 14 ambapo itachezwa kwenye Uwanja wa Taifa, na Chamazi Dar es Salaam.
“Kocha ameshawasili nchini tangu leo alfajiri (jana) na jioni ataanza kazi yake rasmi kwenye Uwanja wa TCC Chang’ombe,” alisema Kamwaga.
Cirkovic ndiye aliyeipa Simba ubingwa wa Tanzania Bara msimu uliopita na sasa ana jukumu la kuiongoza timu hiyo kwenye michuano ya Kombe la Kagame ambapo Simba ina historia ya kulitwaa taji hilo mara sita.
Simba ilikuwa ziarani Kanda ya Ziwa ambapo ilicheza mechi ya kirafiki dhidi ya Toto African kwenye Uwanja wa CCM Kirumba na kuibuka na ushindi wa mabao 2-0 na nyingine dhidi ya Express ya Uganda ambapo zilitoka sare ya bao 1-1.
Mbali na Simba, timu nyingine inayoshiriki michuano ya Kombe la Kagame ni Yanga ambayo ndiyo bingwa mtetezi na Azam.
